وكالة أوقات الشام الإخبارية
قرض المليون الفوري ..توضيحات
في تعليق على صورة حول القرض المليون الفوري من مؤسسة التمويل الصغير على مواقع التواصل..
لفتنا رد توضيحي من أحد الموظفين في البنك ونعرضه كما ورد لفائدة الجميع :
“” مسا الخير للجميع،
على اعتباري موظف بالوطنية للتمويل الصغير و شفت التعليقات حبيت وضح كم نقطة منعاً لأي التباس.
اول شي هاد القرض نوع من مجموعة انواع للقروض يلي بتقدمها الوطنية.
هاد القرض من اسمو مبين / قرض فوري /
القيمة بين 250,000 للمليون ليرة و المدة بين سنة للاربع سنين.
متل اي قرض عليه فوائد و فائدة هاد القرض 13% سنوياً و هي فائدة ثابتة.
يلي بيقدروا يستفيدوا من القرض هنن الموظفين بالقطاعين العام و الخاص، قيمة القرض بتتحدد حسب صافي الدخل كل ما كان صافي الدخل كبير كان بامكانك الاستفادة من مبلغ اكبر.
الفئة التانية هنن اصحاب المهن و الحرف يلي قادرين يثبتوا دخلهن بأي طريقة ممكنة ( عقد ايجار، سند ملكية، ورقة من المختار، …. )
الغاية من القرض ممكن نختصرها بمثال صغير، لنفترض شوفير تكسي أو سرڤيس عم يتعيش من هالآلية، و صار معو عطل أو لا سمح الله عمل حادث، وارد جداً ما يكون معو اجار الاصلاح، ببساطة فيه يقدم على القرض الفوري و ياخد حاجتو بالضبط، بمعنى آخر ليش ليتدين من الناس و يكسر عينو لفلان و علان و هو قادر يحصل على القرض بالسرعة اللازمة.
لنكون واضحين هاد القرض الغاية منو تلبية الحاجات الطارئة للموظفين او لاصحاب المهن و الحرف، مو لنشتري موبايل أو نطلع فيهن مشاوير.
و للتوضيح المصرف خاص و مانو جهة حكومية.
بالأخير الله يفرج على بلدنا و ترجع الليرة تحكي …””
المصدر:: سينسيريا
اقرأ أيضا: كم يبلغ نصيب الفرد من اللحمة شهرياً ؟!