وكالة أوقات الشام الإخبارية
لاعب سوري في أولمبياد طوكيو يرد على منتقديه: انتو أفشل أمة أخرجت للناس
رد اللاعب السوري محمد ماسو الذي شارك بالأولمبياد في مسابقة الترياثلون على الأشخاص الذين قاموا بالاستهزاء به بسبب مركزه المتأخر في السباق الذي أقيم ضمن أولمبياد طوكيو.
وكتب ماسو على صفحته : الواقع انو انتو افشل امة اخرجت للناس لا ومو بس بهيك اذا بتشوفو حدا انجز شي فورا بتضلو تتمسخروو تضحكو ياأمة المسخره ! شكرا عبتضحكونا كتير .
وتابع ماسو الذي حقق المركز 47 من أصل 49 متسابق: بحب احكي للي عم يتمسخر علي و يقلل من انجازي اذا مابتعرف برياضه يفضل مايحكي وتاني شي اذا مانك مقدر بلدك فيو حرب و وضع البلد الي مأثر عكلشي كمان هي مشكلتك وتالت شغلة الرياضة بدها دعم وتخطيط لسنوات لتوصل للأولمبياد لأنو هو أكبر حدث رياضي بالعالم وبيجي عليه أفضل الرياضيين بالعالم !
بتشوف امريكي فايت مركز اربعين اشتهيت شوف تعليق عليه غلط ونفس الشي الكندي الي خلص السباق بعدي اشتهيت واحد عم يتمسخر عليه بس نحنا ماشاطرين غير بالمسخره والتنظير عبعض ولك ياريت الي عم ينتقدك احسن منك لا بكون كرشو مدلل مترين !
حبيب الرياضه مو بس ربح و ميداليات هدول اللاعبين الي معي نفسون من عشر سنين ماكانو يجيبو شي بس اكيد بدعم بلدن ومدربينون وجمهور بلدن قدرو بعد يرجع ! وايد لوحدها مابتسفق بس انا عبخليها تسفق اذا ماعاجبك شي تفضل لبيس البدله ونزيل !
واضاف ماسو: سؤال انت شو بتعرف عني وعن رياضتي لتنتقدني وتقلل من انجازي و ارقامي شو بتعرف عن محمد ماسو من سنين و تعب وجهد هاد احسن نتيجه ومستوى الي بعمري اذا مابتعرف شي يفضل ماتحكي شي او تفضل لاحكيلك عن اللعبه ! لاعبين عم يكلفو مليون دولار بالسنه وانت لسع مفكر النجاح بخطة طجت لعبت و رضاء الوالدين انا صرلي عم خطط تلت سنين لاوصل بس للاولمبياد باصعب الظروف لك جواز سفر بلدك مابطالعك عالسطوح كان كل بلد يزل الدنيا تبعي لاني بس سوري وبدك يعني نعمل انجاز هون تفضل انت شو قدمت بالسنين الماضيه لتتفضل وتنتقد هلق وتحكي !
بس منيح اهم شي عندي جمهور كبير من دول العالم وخاصه هولندا والمانيا الي متابعيني لحظة بلحظة وجمهور عربي كمان بشجعوني ومتابعيني من سنين وبيعرفو شو معناتا اولمبياد اذا مفكرها بطولة حارات يعني حسب ثقافتك و بتمنى اكون عم مثلون بافضل صورة بس انا برأيي اذا عندك كتير وقت بس لتنتقد العالم عالسوشيال ميديا فانت حدا فاشل و غيرك وصل للعالمية و صوتو مسموع برا كتير ! لا تفكر عم تأثر عليي لأنك جاهل بعذرك بالعكس صرلنا عم نسمع انتقادكم من سنين وهاد الشي مابأثر علينا لانو في ناس بتقدر تعبنا وهاد كافي.
وكان ماسو تعرض لموجة من التعليقات الساخرة والتنمر على مواقع التواصل بسبب ما اعتبره البعض مركز متأخر للاعب السوري الذي يعيش في ألمانيا علما أنه الرقم الأفضل الذي حققه لاعب سوري في هذه اللعبة وهو يشارك للمرة الأولى في الأولمبياد.
اقرأ أيضا: فتح رحلات طيران بين حلب ومدينة روسية.. موسكو ودمشق توقعان على مذكرة جديدة
