صحفية سورية تعلن إصابتها بفيروس كورونا وتشرح أعراضه

صحفية سورية تعلن إصابتها بفيروس كورونا وتشرح أعراضه

اعلنت الصحفية “نور قاسم” والتي تعمل في جريدة “تشرين” عبر صفحتها في “فيسبوك”، إصابتها بفيروس كورونا المستجد، داعيةً الناس إلى عدم الخوف من المرض وألّا يتعاملوا معه كأنه عيباً.

وقالت نور :”فيروس كورونا منتشر وطبيعي جدا يتفشى، طبعا أنا اكتشفتو معي من ثلاثة أيام ومن حسن الحظ إني بهالفترة كنت عم خفف كتير طلعاتي من حوالي أسبوع بسبب عارض صحي آخر كان صايبني والحمدالله إني ما كنت انزل لمكان عملي” .

وأضافت «حبيت شارككم تجربتي وحتى نبه الناس لأنو الفيروس قريب جدا من الجميع دون استثناء، والأهم إنو حابة وصل رسالة ما حدا يخاف منه لأنو هو مو بعبع بس مشكلته أعراضه مختلفة من شخص لشخص ويلي عندو مشكلة بالمناعة لازم ينتبه كتير، مثلي أنا عندي نقص بفيتامين دال وهو مهم بالجسم لإكسابه مناعة”.

واكملت”الكل يفحص فيتامين دال عندو ويلي بلاحظ نقص فيه لازم ياخد من هالفيتامين تبعا لوصفة طبية، اوعكم أي حدا ياخد من فيتامين دال بدون التأكد من وجود نقص لأنو زيادة الجرعة والجسم مو بحاجته رح يأدي لأمور عكسية وتسمم بالدم”.

وحول اكتشاف الإصابة بالفيروس، قالت قاسم، “اكتشفت الإصابة من خلال فقداني لحاسة الشم نهائياً منذ 3 أيام وكل الأعراض موجودة عندي وطبعا سألت طبيب وسألني عدة أسئلة ومن خلال إجاباتي شخص حالتي بإنو معي كورونا وخبرني إنو لحد الآن وضعي مو خطير واعزل حالي وآخد كل الفيتامينات وأهم شي المواظبة على فيتامين دال”.

وأضافت «الأعراض موجودة عندي ما عدا الحرارة والسعال الجاف؟ على العكس سعالي مو كتير بس هو مع بلغم يمكن هالشي رحمة من الله لأنو تكاثف هذا البلغم بالرئة هو يلي بأدي لضيق النفس يلي أنا ما عم عاني منه بفضل الله،لهيك إذا حدا سعل مع بلغم لا يقول مو كورونا لأنو ممكن تكون كورونا من خلال تجربتي”.

وبينت نور أنه من “الضروري عدم المصافحة والتقبيل ولازم دائما تغسلوا أيديكم، وتعقموا محفظة النقود من خلال إضافة كحول ومياه ببخاخ وبخ النقود بشكل مستمر وياريت أصحاب المحال يتبعوا هالشي، وبتمنى من كل حدا معه كورونا يلبس كمامة إذا اضطر وطلع وعدم استخدام وسائل نقل عامة وإذا طلع تكسي يبخ باب التكسي والمقعد بالمعقم”.

واختتمت نور بالقول «بالنهاية الحمدالله على كل حال وما تخافوا منه ولا تهولوا الموضوع إذا صابكم لأنو أمر طبيعي، وإذا فرضاً انصبتوا فيه حجروا أنفسكم بأنفسكم ولا تطلعوا أبدا غير للضروري جدا وإذا اضطريتوا تطلعوا، احموا الناس يلي بالطريق بوضعكم للكمامة وتعقيم أيديكم وتعقيم أي شيء تلمسونه طول الوقت”.

وكانت الفنانة السورية هناء نصور خاضت تجربة الإصابة بالفيروس خلال زيارتها إلى البرازيل، أواخر آذار الماضي، معلنة إصابتها وشفاءها بعد مدة عبر صفحتها في فيسبوك.

الخبر

اقرأ ايضاً: السفارة السورية في بيروت توضح مدة اختبار “كورونا” لعبور الحدود